पर्साको पोखरिया प्रादेशिक अस्पतालमा उपकरण बिग्रिएर लामो समयदेखि सेवा अवरुद्ध हुँदा उपचारका लागि आउने बिरामीहरू निजी स्वास्थ्य संस्थामा जान बाध्य भएका छन् ।
अस्पतालमा एक्स–रे सेवा करिब तीन महिनादेखि र ल्याब परीक्षण सेवा दुई महिनादेखि बन्द छ । दैनिक तीन सयभन्दा बढी बिरामी आउने यस अस्पतालमा आधारभूत परीक्षण सेवा नै ठप्प भएपछि सर्वसाधारण मर्कामा परेका छन् ।
सेवा अवरुद्ध हुँदा स्वास्थ्य बीमा भएका बिरामीले समेत बाहिर महँगो शुल्क तिरेर परीक्षण गराउनुपरेको गुनासो गरेका छन् । औषधि अभाव र उपकरण मर्मत नहुँदा अस्पतालको सेवा क्षमता कमजोर बनेको छ ।
अस्पताल प्रशासनका अनुसार आर्थिक स्रोत अभावका कारण उपकरण मर्मत गर्न सकिएको छैन । आवश्यक बजेट प्रदेश सरकारसँग माग गरिएको भए पनि हालसम्म उपलब्ध नभएको मेडिकल सुपरिटेन्डेन्ट डा. आनन्द रौनियारले बताएका छन् ।
स्वास्थ्य बीमा बोर्डबाट बक्यौता रकम नआउँदा औषधि खरिदसमेत प्रभावित भएको अस्पतालले जनाएको छ । स्थानीयवासीले अस्पताललाई प्रभावकारी बनाउन तत्काल बजेट व्यवस्थापन र उपकरण मर्मत गर्न सरकारसँग माग गरेका छन् ।
