अवैध माछा मार्ने कार्यका कारण भूमध्यसागरका ठूला सेता शार्कहरू लोपको खतरा सामना गरिरहेका छन्। बीबीसीले अमेरिकी वैज्ञानिकहरूका अनुसन्धानलाई उद्धृत गर्दै जनाएको छ कि उत्तर अफ्रिकी माछा बजारमा यी संरक्षित प्रजातिका शार्कहरू अवैध रूपमा बिक्री हुँदै आएका छन्।
‘ब्लू मरीन फाउन्डेशन’सँग साझेदारीमा काम गर्ने अमेरिकी वैज्ञानिकहरूले सन् २०२५ मा मात्र कम्तीमा ४० वटा ठूला सेता शार्कहरू मारिएको पत्ता लगाएका छन्। यी शार्कहरू अन्तर्राष्ट्रिय कानूनअनुसार संरक्षित छन् र मार्न वा बेच्न गैरकानूनी छ।
भर्जिनिया टेकका प्रमुख अनुसन्धानकर्ता डा. फ्रान्सेस्को फेरेट्टीका अनुसार पछिल्ला दशकहरूमा भूमध्यसागरमा ठूला शार्कहरूको सङ्ख्या विशेषगरी सेता शार्कहरूको सङ्ख्या नाटकीय रूपमा घटेको छ। बीबीसीले उत्तर अफ्रिकी बन्दरगाहहरूमा मृत अवस्थामा फेला परेका संरक्षित शार्कहरूको फुटेज पनि सामाजिक सञ्जालबाट पुष्टि गरेको छ।
