वीरगंज, पर्सा |
मानव बेचबिखन तथा ओसारपसारविरुद्धको राष्ट्रिय दिवसको अवसरमा जिल्ला प्रहरी कार्यालय पर्साका प्रमुख प्रहरी उपरीक्षक (एसपी) गौतम मिश्रलाई सम्मान गरिएको छ।
महिला, बालबालिका तथा जेष्ठ नागरिक मन्त्रालयद्वारा शुक्रबार आयोजित कार्यक्रममा ७७ वटै जिल्लाका प्रहरी कार्यालयमध्ये मानव बेचबिखनविरुद्ध सबैभन्दा प्रभावकारी अभियान सञ्चालन गरेको आधारमा पर्सा प्रहरीले पहिलो स्थान हासिल गरेको घोषणा गरिएको हो।
एसपी मिश्रले करिब ७ महिना अघि पर्सामा कार्यभार सम्हालेलगत्तै मानव तस्करी नियन्त्रणलाई उच्च प्राथमिकतामा राखी अभियान सञ्चालन गरेका थिए। उनको नेतृत्वमा जिल्ला प्रहरी कार्यालय पर्साले:
-
१५ वटा मानव बेचबिखनसम्बन्धी मुद्दा दर्ता,
-
१७ जना अभियुक्त पक्राउ,
-
३०० जना जोखिममा परेका महिला तथा बालबालिकाको उद्धार,
-
३५० भन्दा बढी चेतनामूलक कार्यक्रम सञ्चालन,
-
तथा विभिन्न संघसंस्थासँग समन्वयमा समुदायस्तरमा व्यापक अन्तरक्रिया गरेको छ।
मन्त्रालयले यिनै उपलब्धिलाई आधार मानी पर्सा जिल्लालाई ‘मानव बेचबिखनविरुद्ध उत्कृष्ट जिल्ला’ घोषणा गर्दै प्रमुख मिश्रलाई प्रशंसा–पत्रसहित सम्मानित गरेको हो।
एसपी मिश्रले सम्मान ग्रहणपछि भने,
“मानव बेचबिखनजस्तो संवेदनशील अपराध विरुद्धको लडाईंमा प्रहरी मात्र होइन, समुदायको सक्रिय सहभागिता पनि आवश्यक छ। हामी अझ प्रभावकारी रूपमा अभियानलाई अघि बढाउँछौं।”
पर्सा प्रहरीको अभियानले सीमावर्ती जिल्लामा अपराध नियन्त्रणका लागि सकारात्मक सन्देश दिएको सरोकारवाला निकायहरूले बताएका छन्।
